D’Online-Liwwerplattform „Wedely“ versprécht Aarbechter, si kéinten 200 Euro den Dag op eng „einfach Manéier“ verdéngen. En Ex-Livreur widdersprécht där Pub. Ëm d’Realitéit hannert der Plattform-Ekonomie geet et an der véierter Episod vun „Aarm trotz Aarbecht“.

„Wa Wedely sech etabléiert huet, da geet een dovunner aus, datt et legal ass. Si hunn e Büro, si siche Leit – dat ass sécher legit!“, seet de Kevin*. Net eréischt zanter der Pandemie hu Servicer vun digitale Plattformen sech zu Lëtzebuerg fest etabléiert. Mee de Business-Model vun dëse Firme wërft eng Rei Froen op. Duerch eng feelend Gesetzgebung kënne sech Plattforme wéi Wedely hire sozialen a legalen Obligatioune géigeniwwer Mataarbechter deelweis entzéien.

Am Podcast „Aarm trotz Aarbecht“ erzielt de Kevin vu senger Erfarung als Livreur fir „Wedely.com“, gëtt Abléck hannert Kulisse vun der Liwwerplattform an erkläert, firwat et ganz schwéier ass, duerch sou eng Aarbecht säi Liewensënnerhalt ze decken.

Déi ganz Episod gëtt et hei ze lauschteren:

„Aarm trotz Aarbecht“ ass eng nei Podcast-Serie vu Reporter.lu iwwer Leit, déi zu Lëtzebuerg schaffen an awer net genuch verdéngen, fir en anstännegt Liewen ze hunn. Dir fannt d’REPORTER-Story och op Spotify, do och als Download fir offline ze lauschteren, bei Apple Podcasts, Google Podcasts an op weidere Plattformen.

*Numm vun der Redaktioun geännert

Méi zum Thema

Podcast „Aarm trotz Aarbecht“: Sozialhëllef ass net geschenkt - Reporter.lu

D’Ann ass op staatlech Hëllef ugewisen. Si wëll awer finanziell op eegene Been stoen. Huet d’REVIS-Reform hir Ziler erreecht? Wéi schwéier ass et fir Betraffener, aus deem System eraus ze kommen? Dorëms geet et an der drëtter Episod vun „Aarm trotz Aarbecht“.

Reporter.lu

Podcast „Aarm trotz Aarbecht“: D'Limitte vum „Lëtzebuerger Dram“ - Reporter.lu

Den André huet grouss Pläng fir seng berufflech Karriär. Bis elo krut hien awer just eng fest Platz bei enger Botzfirma ugebueden. Wéi schwéier ass et, säi soziale Milieu ze iwwerwannen an opzesteigen? Dorëms geet et an der zweeter Episod vun „Aarm trotz Aarbecht“.

Reporter.lu

Podcast „Aarm trotz Aarbecht“: Eng elengerzéiend Mamm an der Inflatiounskris - Reporter.lu

Eng elengerzéiend Mamm, déi trotz guddem Job op d’Epicerie sociale ugewisen ass: Dat ass d’Geschicht vum Delfina. Firwat si Monoparentalle besonnesch dem Aarmutsrisiko ausgesat a wat misst sech änneren? Dorëms geet et an der éischter Episod vun „Aarm trotz Aarbecht“.

Reporter.lu